Leik Ægis og Hugins á Seyðisfirði var rétt í þessu að ljúka en þetta var síðari leikur liðanna í 8 liða úrslitum 3. deildar. Þessi úrslit þýða að Ægir er komið í undanúrslit en okkar menn sigruðu rimmuna við Hugin samanlagt 2:1.
Ægismenn komust í 1:0 þegar um 15 mín. voru búnar af leiknum, það var Matti sem skoraði markið og þannig var staðan í hálfleik.
Fljótlega í síðari hálfleik komust okkar menn í virkilega þægilega stöðu þegar leikmaður Hugins var rekin af velli með tvö gul spjöld. En Adam var ekki lengi í paradís því Ingi Rafn fékk skömmu síðar að líta sitt annað gula spjald og því jafnt í liðum, í kjölfarið jöfnuðu síðan heimamenn metin. En Ægisstrákarnir stóðust álagið og fengu ekki á sig fleiri mörk. Niðurstaðan því 1:1 jafntefli.
Sem fyrr segir þá er liðið komið í undanúrslit og mótherjinn verður Magni frá Grenivík en með því liði leikur einmitt Ægismaðurinn Elfar Þór Bragason. Fyrri leikurinn fer fram á Grenivík næstkomandi laugardag en við eigum heimaleik miðvikudaginn 12. september.