Knattspyrnufélagið Ægir

Saga félagsins

Knattspyrnustarf í Þorlákshöfn var lengi vel rekið sem hluti af Ungmennafélaginu Þór, sem stofnað var um 1960. Undir merkjum Þórs var keppt í knattspyrnu frá upphafi skipulags keppnishalds og fram á níunda áratuginn.

Á seinni hluta níunda áratugarins vaknaði aukinn áhugi á sameiginlegu knattspyrnusamstarfi strandbæjanna Þorlákshafnar, Eyrarbakka og Stokkseyrar. Um mitt ár 1987 hittust fulltrúar frá þessum stöðum með það að markmiði að kanna möguleika á stofnun sérstaks knattspyrnufélags, þar sem knattspyrna á svæðinu hafði átt undir högg að sækja. Ákveðið var að halda málinu áfram og stefna að stofnfundi um haustið. Sú vinna skilaði árangri og Knattspyrnufélagið Ægir var stofnað 6. desember 1987.

Árið 1988 tók Ægir í fyrsta sinn þátt í Íslandsmóti með lið í meistaraflokki karla sem þá lék í 4. deild og endaði í 7. sæti.

Að stofnun félagsins komu:

• Magnús Skúlason og Jón Eiríksson frá Eyrarbakka,
• Jóhann Þórðarson, Marteinn Arilíusson og Óskar Arilíusson frá Stokkseyri,
• Ellert Hreinsson, Jóhannes Guðmundsson og Ármann Sigurðsson frá Þorlákshöfn.

Stokkseyringar drógu sig úr samstarfinu ári síðar. Samstarfið milli bæjanna gekk vel um tíma en eftir að Eyrarbakki varð hluti af sveitarfélaginu Árborg árið 1998 dró smám saman úr starfsemi þar. Síðan þá hefur félagið alfarið verið rekið af Þorlákshafnarbúum.

Í upphafi var áhersla fyrst og fremst lögð á rekstur meistaraflokks karla. Það breyttist fljótt, því árin 1991 og 1992 lék meistaraflokkur kvenna undir merkjum Ægis í annarri deild Íslandsmótsins. Starfsemi yngri flokka hófst árið 1992 og hefur síðan verið einn af burðarásum félagsins. Fyrstu árin var starfið leitt af miklum metnaði undir stjórn Hólmars Sigþórssonar og Garðars Geirfinnssonar.

Kvennaknattspyrna hófst á ný árið 1999 og voru lið í nánast öllum flokkum Íslandsmótsins. Ásdís Viðarsdóttir og Garðar Geirfinnsson stýrðu því starfi af festu og fagmennsku.

Árið 2000 fór Ægir í samstarf við Hamar og kepptu félögin það ár undir nafninu Hamar/Ægir í meistaraflokki og 2. flokki karla. Eftir tímabilið var ákveðið að ljúka samstarfinu. Samstarf við Hamar hófst þó aftur árið 2007 í yngri flokkum og hefur verið með einhverjum hætti nær samfellt síðan þá. Einnig var samstarf við Selfoss í eldri unglingaflokkum til að tryggja þátttöku í 11 manna knattspyrnu. Árið 2025 er samstarf Hamar og Ægis enn í gildi í yngri flokkum en Selfoss hefur dregið sig út vegna breyttra forsendna.