Knattspyrnudeild Ægis hefur tryggt sér áfram þjónustu eins af sínum allra sterkustu leikmönnum, en framherjinn Jordan Adeyemo hefur framlengt samning sinn við félagið. Adeyemo var einn af lykilmönnum liðsins á síðasta tímabili og átti stóran þátt í að Ægir tryggði sér titilinn í 2. deild karla 2025.
Adeyemo, sem er 25 ára og uppalinn í Dublin á Írlandi, reyndist gríðarlega öflugur í sínum fyrsta tímabili á Íslandi. Hann varð markakóngur deildarinnar með 19 mörk og bætti við 10 mörkum í Mjólkurbikar og Lengjubikar. Samtals skoraði hann því 29 mörk í 30 leikjum – frábær árangur sem vakti athygli fjölmargra félaga.
Áður en Adeyemo kom til Íslands lék hann bæði í efstu og næstefstu deild á Írlandi og er talinn á besta aldri til að halda áfram að þróast sem leikmaður. Forráðamenn Ægis lýsa mikilli ánægju með að hafa tryggt áframhaldandi veru hans hjá félaginu, sérstaklega í ljósi þess að önnur lið sýndu honum verulegan áhuga.
Framlengingin er mikilvæg fyrir Ægir þar sem vonir standa til að Adeyemo haldi áfram að raða inn mörkum og verði lykilmaður í sóknarleiknum á komandi tímabili í Lengjudeildinni.